من زمان مستنى تكبر عشان أقولك الكلمتين دول، لكن يا ترى هاتسمعنى؟ هاتفهمنى؟ بالله عليك حاول يابنى.. عايز أقولك سامحنى.. سامحنى على إنى أبوك.. على عيوبى اللى مقدرتش أصلحها وعلمتها ليك.. ولمتك عليها وعاقبتك بيها.. والعيب مش فيك.. فى صفاتى الرذيلة وجيناتى العليلة اللى نقلتها ليك! وشفتك بتعانى منها وبتشقى بيها.. وضجيت بيك مع إنه مش بإيديك!!
سامحنى عشان طاوعت أنانيتى وحبيت أنول نصيبى من زينة الدنيا.. فجيبتك ليها.. مع إنى عارف الظلم اللى فيها.. جبتك عشان تكون درجة تالتة من أول ما تفتح عينيك.. جبتك فى وقت لا هو ليا ولا ليك.. جبتك وسط حرب خسرانة.. وفى كفه هبطانة.. ولضماير خربانة.. والحالة خيبانة وقولتلك لو معرفتش تعيش يبقى العيب عليك!! جبتك فى عالم بقى كل شىء فيه مخيف.. ناس بتقتل فى بعضها على أى حاجة.. اللى على كورة.. واللى على فلوس.. واللى على رغيف.. يا عالم بكرة الناس هاتموت بعضها على إيه؟ بيتهيألى على نقطة المية!!
ما أنا نسيت أقولك إننا ياما بعترناها يمين وشمال من غير ما نفكر فيك!!.. سامحنى على أمك اللى يمكن ماخترتهاش زى ما إنت عايز.. غلطت.. سهيت.. تعبت.. جايز لكن يابنى ما هى بنى آدمة برضه.. وربنا أعلم بيها وبيا وبيك!!.. سامحنى على اللى ما قولتوش، ولا زرعتوش، ولا ربتهوش فيك.. سامحنى على كل غلطة عملتها فى حقك، وأنا فاكر نفسى بربيك، أقولك.. سامحنى حتى على اللى علمتهولك لأنه أكيد فى زمانك لا هاينفع ولا هايشفع ليك!! يمكن تكون مش راضى أو مش مسامح لكن حتى لو مقدرتش كل اللى طالبه منك تدعى لى أنا وأمك.. يرحم والديك!!
دكتورة صيدلانية هبه يس
No comments:
Post a Comment